ILOILO — Dead-on-arrival sa ospital ang 39-anyos nga construction worker sang gintiro sang iya abyan sa guwa sang restobar sa service road pakadto sa Iloilo International Airport sa Barangay Camambugan, Sta. Barbara las-10:20 kagab-i, Enero 31.
Suno kay Police Lieutenant Christopher Juarez, Deputy Chief of Police sang Sta. Barbara Municipal Police Station, nakaguwa na sa restobar ang biktima nga si alyas Lem kag suspect nga si alyas Jet, pareho nga naga-edad 39-anyos sang natabu ang pagpangtiro.
Nauna si Jet sa iya salakyan pero nagbalik nga may dala na nga caliber 45 kag makapila ka beses nga gintiro sa dughan si Lem.
Lima ka basiyo sang caliber 45 ang na-recover sa lugar.
Wala sang License to Own and Possess a Firearm ang suspect.
Gin-ako man sang suspect ang iya nahimo nga tuga sang kahulugbon.
Pasakaan sang kaso nga murder ang suspect. — Aksyon Maria Kayla Tingzon
