ILOILO CITY — Patay ang 30-anyos nga delivery driver sang gintiro sa sulod sang poultry dressing plant sa Iloilo Fish Port sa City Proper kahapon sang hapon, Setyembre 10.
Ginkilala ang biktima kay Darwin Ginarangan, delivery driver sang planta kag residente sang Escalante, Negros Occidental. Suspect sang krimen si John Mark Cabuyao, 27-anyos nga helper sang ginatrabahuan sang biktima kag residente sang San Antonio, Molo.
Ginpabutyag sang suspek nga samtang yara sila sa sulod sang planta, gintiro niya ang biktima gamit ang paltik nga pusil.
Nagdepensa ang suspek nga nahimo niya ang krimen tungod ginpahog siya sang nagligad nga adlaw sang biktima nga patyon kag ang iya nga pamilya.
Ginkulbaan si Cabuyao tungod may armas ang biktima.
Pagkatapos sang insidente, nagpalagyo ang suspek padulong sa ila balay pero nadakpan sang police.
Nagapadayon pa ang imbestigasyon sa insidente.
