Pilason ang 39-anyos nga disc jockey sang gintiro sa sulod sang cellphone store sa Boracay Island Brgy. Balabag Malay, Aklan kahapon, Oktubre 14.
Suno kay Police Lieutenant Colonel Alain Terrence Licdan, chief of police sang Malay Municipal Police Station, nagsulod ang suspek sa cellphone store kag gintiro ang biktima.
Sa imbestigasyon, naglab-ut sa guwa sang store ang pagpinukutay sang biktima kag suspek tubtob nga nabatian ang duha ka lupok.
Tungod may na-deploy nga police sa area, gilayon nakaresponder kag naaresto ang suspek.
Ginpahayag ni Licdan nga sang nagligad nga tuig naga-arkila sa suspek ang biktima. Sa tion nga ginasukot sang suspek ang biktima nga nagabayad man, nagapamuyayaw na ang biktima, suno sa police gani ginasundan ang motibo nga daan nga hiligut-anon.
Dugang pa sang police, may nakit-an nga post sa social media ang suspek nga ginatumod siya gani ginalantaw nga nagsupot ang kaakig kag nakakuha sang oportunidad nga himuon ang krimen.
May multiple gunshot wounds sa dughan, liug kag sa guya ang biktima nga padayon ginabulong sa ospital.
Detained sa Malay Police Station ang suspek nga pasakaan sang kaso nga frustrated murder. — Aksyon Paula Elambayo
