ILOILO CITY — Nagreklamo ang 15-anyos nga dalagita nga ginhimuslan siya sang tatlo ka mga lalaki sa isa ka barangay sa Mandurriao kaina sang kaagahon.
Sa panaysayon sang tagreklamo, gin-chat siya sang iya 15-anyos nga ex-boyfriend kagab-i nga matambay.
Tungod sini, nagkadto siya upod ang iya abyan nga 13-anyos sa lugar nga ginhambal sa iya nga ila tambayan.
Ginpahayag sang tagreklamo nga naghagaray sila nga pito (7) nga mag-inum inom sa lugar.
Ang pito ginabug-usan sang tagreklamo, iya abyan nga 13-anyos, iya ex-boyfriend, duha ka 18-anyos nga lalaki, 17-anyos nga solterito, kag isa pa gid ka babaye nga naga-edad sang 15-anyos.
Sa panaysayon sang tagreklamo, pagkatapos nila inom mga las-4 sang kaagahon naghambal siya sa iya mga upod nga indi lang siya anay magpuli tungod maakigan siya sang iya iloy gani nagpahunay-hunay sila sa payag malapit sa lugar nga ila gin-imnan.
Samtang nagahigda, ginpahayag sang tagreklamo nga nabatyagan niya nga ginahublasan siya kag ginhimuslan sang apat ka mga lalaki. Nagsinggit man siya suno sa iya agud mangayo sang tabang apang wala sang nakabati tungod malayo ang mga pamalay sa palibot.
Ginapunggan naman suno sa iya sang 15-anyos nga babaye ang iya abyan nga 13-anyos agud indi makapanugid.
Gintudlo sang tagreklamo nga naghimulos sa iya ang iya ex-boyfriend, ang 17-anyos, kag 18-anyos nga lalaki. Samtang ang isa pa ka 18-anyos nga lalaki ang wala na nagdayon tungod nagapakitluoy ang tagreklamo nga untatan na ang ginahimo sa iya.
Pagkatapos sang natabo nagpauli ang apat ka mga lalaki kag ang upod nila nga babaye. Nagpauli man ang tagreklamo kag ang iya abyan.
‘PAANO NA-CUSTODY ANG MGA GINAREKLAMO’
Samtang nagapapuli ang tagreklamo nabatian siya sang mga barangay tanod nga nagahibi. Gin-usisa siya kag ginsugid niya ang natabo.
Ginpahibalo naman sang tanod ang iloy sang tagreklamo. Pamilyar man ang mga tanod sa mga ginareklamo gani ila ginkadtuan.
Magparyentihanay lang ang apat ka mga lalaki kag ang babaye nila nga upod kag isa lang ka balay ang ila ginateniran.
Pag-abot sang mga tanod sa ila balay, naabtan ang lima nga nagakatulog. Sunod sila nga gin-turnover sa Mandurriao Police Station.
‘PAHAYAG SANG MGA GINAREKLAMO’
Nag-ako ang ex-boyfriend sang babaye nga may natabo sa ila pero wala na siya nakadumdom pa sang iban nga mga natabo tungod sa kahulugbon.
Ginpahayag niya man nga wala niya ginpilit ang tagreklamo nga makighilawas.
Samtang wala naman nakadumdom ang 17-anyos kun ano ang mga natabo sa ila tungod ginpahayag niya nga nahubog man siya.
Gin-custody sang Mandurriao Police ang ex-boyfriend sang tagreklamo, ang 17-anyos nga solterito, kag ang 15-anyos nga dalagita nila nga upod samtang ginpreso naman ang duha ka 18-anyos nga lalaki.
Ginpahayag sang iloy sang tagreklamo nga pursigido sila nga magpasaka sang kaso.
