ILOILO CITY — Ginabanta pasado las-12 sang kaagahon, July 5, nag-surrender kay Police Brigadier General Randulf Tuaño, director sang Police Regional Office 6 (PRO 6), ang dismissed police officer nga target kuntani dakpon sang PNP Integrity Monitoring and Enforcement (PNP-IMEG) sang July 1 sang hapon sa Molo Police Station.
Ini ang ginkumpirmar ni Tuaño.
Ang pulis ginkilala kay Jerry Villanueva, may kaso nga murder.
Matandaan, nangin kontrobersyal ang amo nga operation tungod sa mga report: nga ginpahapa, gindisarmahan ang kapulisan, gintayaan sang pusil lakip ang barangay official, kag katapo sang media nga yara sa sulod sang Molo Police Station.
Maserbe kuntani sang warrant of arrest ang PNP-IMEG kaupod ang Philippine National Police – Special Action Force (PNP-SAF) sa dismissed police officer pero wala nakita sa police station ang subject.
Antes gin-conduct ang amo nga operation, suno sa source sang Aksyon Radyo News Team makapila ka beses nga nakita si Villanueva sa Molo Police Station.
Sa subong, naka-custody na sa Iloilo City Police Office (ICPO) si Villanueva.
Sa interview kay Atty. Michelle Yotoko, spokesperson sang National Police Commission (NAPOLCOM) 6, ginpahayag niya nga may impormasyon ang PNP-IMEG nga may dismissed police officer nga nasiplatan sa Molo Police Station kag gin-alegar nga gina-upod sa police operations.
Wala gintumod sang mga otoridad nga si Villanueva, ang dismissed police officer nga gina-ayam sang PNP-IMEG.
Nakilala si Villanueva, base sa source sang Aksyon Radyo Iloilo sang nagsungka siya sa PRO6.
Sa “surprise inspection” sang PNP-IMEG kaupod ang Special Action Force (SAF) sa Molo Police Station – ginpahapa, gindis-armahan, kag gintayaan sang pusil ang mga pulis kag ginpangita ang dismissed police officer sa vicinity sang estasyon.
Si Villanueva ang nagapangatubang sang murder case. Wala pa sang detalye kon parte sa ano ang kaso.
“REGALADO RAID”
Sang 2018, Police Officer 1 (PO1) pa lang ang ranggo ni Villanueva sang nalakip siya sa mga pulis nga miyembro sadto sang Regional Drug Enforcement Unit nga may kaangtanan sa kontrobersiyal nga pag-raid sa balay sang pamilya Regalado.
Sa archives sang Aksyon Radyo Iloilo, ginhingadlan sadto ni former Police Regional Office 6 Director John Bulalacao ang pito ka mga anay miembro sang RDEU nga naghimo sang drug operation nga kanday P03 Marlon M. Legaspi; PO3 Jesus G. Galleron; PO3 Nilo Gamboa; PO2 Jeric D. Dagunan; PO2 Fortunato Moso; PO1 Jerry Villanueva; kag team leader nga si PSINSP Kennith Bermejo.
Ginabanta ni Mrs. Candilaria Regalado, nga nagalab-ut sa masobra P3-million ang nadula nga mga kagamitan sa ila balay sa Sambag, Jaro sa raid sang Philippine Drug Enforcement Agency sang Disyembre 13, 2018.
Ginpahayag ni Mrs. Regalado nga kitaon sa CCTV footage ang pagsulod sang mga operatiba sang mga alahas sa ila bulsa. Ginalakipan ini suno sa iya sang mga malahalon nga alahas nga ginhatag sa iya matapos napatay ang iya bata nga si Meriam Regalado-Odicta, asawa ni late PDEA-identified drug group leader Melvin Odicta.
“TWIN SHOOTING SA ILOILO CITY”
Ang Jerry Villanueva man ang ngalan sang isa sa duha ka mga pulis sa Police Regional Office 6 nga ginpasakaan kaso sang National Bureau of Investigation (NBI) upod sa duha ka iban pa may kaangtanan sa kontrobersiyal nga twin shooting incidents sa syudad sang Enero 19, 2020.
Nakilala si Corporal Villanueva kaupod kay Corporal Joseph Andrew Joven nga mga suspects sa twin shooting nga ginkamatay nanday Allen Muller sa Cuartero, Jaro kag Delfin Britanico sa Nabitasan, La Paz paagi sa mga testigo kag forensic evidence, suno sa National Bureau of Investigation (NBI).
Indi direkta nga konektado ang pagpatay kanday Muller kag Britanico.
Pagkatapos sang shooting sa Cuartero, Jaro, naglabay sa Diversion Road, Mandurriao ang Mitsubishi Adventure nga ginsakyan sang mga suspetsado kag nagliko sa service road pakadto sa Nabitasan, La Paz.Nagpondo sa higad sang karsada sa Nabitasan ang salakyan kag ginkakas sang duha ka mga lalaki nga sakay sa Adventure ang mga ginpapilit nga stickers.
Sa amo man nga tyempo, naglabay sa lugar si Britanico sakay sa iya motorsiklo.Nakita ni Britanico ang pagkakas sang stickers tubtob nga nagluntad ang komprontasyon kag gintiro sang mga suspetsado si Britanico.
Suno sadto kay PRO6 Spokesperson Gilbert Gorero, 2018 sang gin-assign sa Regional Personnel Holding and Accounting Unit si Police Corporal Villanueva nga isa sa mga suspects sa twin shooting incidents sa syudad.
2015 sang gin-assign man sa Iloilo City Police Office si Villanueva.
Sa subong, yara na siya sa kustodiya sang ICPO. — Aksyon Angel Mae Ciudad
