ILOILO — Nakabunggo sa nagatangkas nga hollow blocks ang ginasakyan nga motor sang duha ka mga lalaki sa Barangay Pasig, Lambunao las-8:10 kahapon sang aga, Abril 7.

Suno kay Police Master Sergeant Ramon Legayada, imbestigador sang Lambunao Municipal Police Station, sang nakalab-ot sa kurbadahon ang motor nadulaan ini sang kontrol rason nga naglapaw sa iya nga lane kag nagdiretso sa hollow blocks.

Sa panaysayon sang mga nakakita, ginpahayag ni Legayada nga madasig ang pagpadalagan sang driver nga posible may ginalagas nga motor sa unhan.

Halin sa Barangay Jayobo ang duha kag padulong kuntani sa banwa para ipakay-o ang motor suno sa police.

Gindala pa sila sa ospital pero gindeklarar nga dead on arrival tungod sa pilas sa ulo.