Naga-problema sang ila balayran sa ospital ang pamilya sang driver sang motorsiklo nga nagtabog sang nakabunggo sa puwertahan sang Mitsubishi Expander sa kilid sang Oton public market.
Suno sa asawa nga si alyas Nene, una nga naghatag sang P2,000 nga bulig ang driver sang Expander.
Sang nag-atubangay sila sa police station para sa settlement, ginpahayag ni Nene nga wala nagpasugot ang driver nga siya ang mabayad sang tanan nga balayran sa ospital.
Sa baylo, ginpabutyag sang driver sang Expander nga tungaon nila ni Nene ang balayran sa ospital kag tunga man sila sa balayran sa pagpakay-o sa damage sang iya salakyan. Apang wala nagpasugot si Nene.
“Indi siya magsugot nga i-shoulder niya tanan ang ano [balayran] sa may ospital tapos gusto niya nga mabayad man kami sa salakyan niya 50 percent kay daku kuno damage sa salakyan niya kay mahatag man siya sa amon 50 [percent] para sa ospital. Amo lang lang na una namon na-istoryahan pero indi ako magsugot,” ang pahayag ni Nene.
Naka-istoryahanay man ang driver sang Expander kag ang tiya ni Nene nga mahatag siya sang P10,000, pero asta subong wala pa mahatag ang kwarta.
Nag-text man ang hinablos sang driver kay Nene nga nagahambal nga iproseso niya ang tanan tungod buligan man sila kun makuha na ang insurance sang salakyan.
Apang indi na ma-contact tubtob subong suno kay Nene ang driver sang salakyan kag manugguwa na sa ospital ang iya bana.
Nakatawag pa si Nene sa cellphone number sang driver pero wala sang nagasabat.
Ulihi nga naka-text kay Nene ang driver sang salakyan nga nagahambal nga “P15K na lang gid ang mahatag ko, take it or leave it.”
Ginpahayag ni Nene nga may mild skull facture kag hematoma sa ulo ang iya bana pero estable na ang kondisyon.
Ginpabutyag ni Nene nga daku nga epekto sa ila ang natabo sa iya bana tungod pila siya ka adlaw nga wala nakatrabaho.
Na-untat man temporaryo suno sa iya ang ila gamay nga negosyo tungod sa pagbalik-balik niya sa ospital kag pagdipara sa iya duha ka kabataan.
