ILOILO CITY — Napatay samtang ginabulong sa ospital si Dueñas Vice Mayor Aimee Paz Lamasan sang aksidente nga naglupok ang iya pusil sa ila balay sa Barangay Tabuc Suba, La Paz kaina sang aga.
Suno kay Police Captain Jeffrey Delgado, hepe sang Police Station 2, pasado las-7 kaina sang aga sang nagtawag sa ila ang personnel sang St. Paul’s Hospital nga may gindala nga pasyente nga may pilas sang pagkatiro.
Tungod sini, nagkadto ang pulis kag nag-conduct sang imbestigasyon tubtob nakumpirmar nga bise alklade sang Dueñas ang ginatumod nga pasyente.
Nagahimos ang bise alkalde sang iya mga gamit tungod makadto sa Dueńas para sa gift giving, suno sa imbestigasyon sang pulis.
Base sa partner ni Lamasan, ibutang na kuntani sang bise alkalde sa iya safety bag ang 9mm (Tanfoglio Pistol) sang hinali naglupok.
Sa pagpangusisa sang pulis si Vice Mayor Lamasan ang nagapasakop sa mga gun firing competition. Ini ang rason nga may pusil siya.
Yara na sa pulis ang pusil ni Lamasan kag gin-turn over na sa forensic unit.
Wala pa na-istorya sang mga pulis si Lamasan. — Aksyon Angel Mae Ciudad
