Arestado ang 38-anyos nga elementary school teacher sa drug buy bust operation sa Brgy. Aguilar, San Lorenzo, Guimaras kahapon, Setyembre 21.
Ginkilala ang subject kay Al Ray Catalbas nga ginakabig sang police nga High Value Individual (HVI).
Suno kay Police Major Kennith Bermejo, Head sang Provincial Drug Enforcement Unit sang Guimaras Police Provincial Office, nakabaton sila sang impormasyon nga naga-engage sa illegal activities si Catalbas gani gin-monitor sang malapit sa duha ka bulan tubtob gin-operate.
Na-recover kay Catalbas ang walo ka sachet sang suspected shabu nga ginabanta nagabug-at sang 7.5 grams kag may market value nga P51,000, cellphone nga ginapatihan ginagamit sa illegal nga transaksyon, motorsiklo nga ginapatihan ginagamit sa pag-transport sang illegal nga druga, improvise toter, aluminum foil, empty plastic sachet kag iban pa nga non-drug items
Sa pagpangusisa sang police, sa Iloilo kag Manila nagakuha sang supply sang illegal drugs si Catalbas kag ginabagsakan lang sang wala pa makilal-an nga babaye.
Presu na ang subject sa San Lorenzo Police Station.
