ILOILO — Santu sa rekomendasyon ni Engr. Calai Legria, officer in charge sang Calinog Municipal Disaster Risk Reduction and Management Office, ginsuspender ni Mayor Francisco “Ico” Calvo ang face to face classes halin pre-school tubtob senior high school sa tanan nga public kag private school umpisa buwas, Abril 2 tubtob sa Biyernes, Abril 5 tungod sa pila ka adlaw nga yara sa 40 degrees Celsius pataas ang temperatura nga ginakabig nga yara na sa “dangerous levels”.
Base sa Executive order No. 2024-60 sang alkalde, ginhatagan sang discretion ang mga buluthuan nga maggamit sang alternative modes of delivery of instruction para indi maapektuhan ang pagtuon sang mga estudyante.
Yara naman sa tagdumalahan sang West Visayas State University Calinog Campus ang desisyon sa kun ano nga klase sang set up ang ila nga ipatuman.
Sa statement ni Calvo, tiun nga may pagbag-o sa temperatura, mahimo man nga suspenderon ang executive order.
