ILOILO — Nadakpan sa drug buy bust operation kaina sang aga sa Brgy. Ingay, Tubungan ang ginatudlo source sang illegal drugs ni Aljohn Jalbuna, ang suspek sa pag-rape kag pagpatay sa 18-anyos nga dalaga sang Hunyo 17 sang kaagahon.
Ginkilala ang nadakpan kay Jerald Tagudando, 43-anyos nga residente sang amo man nga lugar.
Una na nga ginpabutyag ni Jalbuna nga “nag-shabu” siya antes ginpatay si alyas Kendi pero wala niya ginbuyagyag kon diin siya nagkuha sang supply.
Nagpositibo man sa drug test si Jalbuna.
PAANO GIN-OPERATE SI TAGUDANDO?
Sang Mayo 2025 nagsugod ang monitoring sang Regional Police Drug Enforcement Unit (RPDEU) sa illegal drug activities ni Tagudando.
Suno kay RPDEU head Captain Glenn Soliman, nagguwa ang ngalan ni Tagudando sang ginatudlo siya nga source sang illegal drugs sang subject nga si Alyas Alex nga nadakpan sa anti-illegal drug operation sa Brgy. Igtuble, Tubungan sang nagligad nga bulan.
Tungod sini, nag-conduct sang follow-up operation ang police kag gintultol nila ang lokasyon ni Tagudando.
Nadugangan pa gid ang impormasyon sang police may kaangtanan sa illegal drug activities ni Tagudando pagkatapos nadakpan si Aljohn Jalbuna nga nag-aku sa pagpatay kay alyas Kendi.
Nakakuha ang police sang confidential agent nga nagbulig agud madakpan si Tagudando.
Na-recover sa subject ang 135 grams sang suspected shabu nga may standard drug price nga P918,000.
“KAY JERALD NAGKUHA SANG DRUGS SI JALBUNA ANTES GINPATAY SI KENDI”
May impormasyon ang police nga posible sa balay ni Tagudando naggamit sang illegal drugs si Jalbuna antes gisulod sa balay kag ginpatay si Kendi.
Ginabanta sa 50 meters ang kalayuon sang balay ni Tagudando sa takas sang balay nanday Kendi.
Sa affidavit ni Aljohn, gin-ako niya nga naggamit siya sang illegal drugs upod kay alyas Botbot antes ginsulod kag ginpatay si Kendi. Pero suno sa iya, natabo ang paggamit nila sang shabu sa payag ni Botbot.
Naga-conduct pa sang follow up operation ang police may kaangtanan sa pagkadakop kay Tagudando. — Aksyon Farrah Mae Morano
