ILOILO — Dead-on-arrival sa ospital ang 46-anyos nga habal-habal driver sang gintiro sa Barangay Pughanan, Lambunao kahapon, Oktubre 13.
Suno kay alyas Nene, bata sang biktima nga si Romeo Soliva, naga-angkas siya motorsiklo sang iya amay upod ang isa pa ka pasahero sang natabo ang pagpangtiro.
Ginpahayag ni Nene nga ginbantayan sang suspek nga si Rolly Lorico ang iya amay sang nag-agi sila sa karsada. Indi makaagi sanday Nene tungod nagatindog sa tunga sang karsada ang suspek tubtob nga gintiro ang iya amay.
Natumba ang motorsiklo suno kay Nene kag nakadalagan pa sila pero ginlagas sang suspek ang iya amay kag liwat nga gintiro.
Napilasan sa dughan kag magtimbang nga abaga biktima, samtang wala naman napilasan si Nene kag isa pa ka pasahero sang motorsiklo.
NAKABAIS SA NAMATYAN
May ginba-isan sa namatyan ang suspek kag ang biktima nga si Romeo Soliva antes natabo ang pagpangtiro.
Ini ang ginpabutyag sang bata nga si alyas Nene nga naka-angkas sa motorsiklo sang iya amay sang natabo ang shooting incident.
Suno kay Nene, indi abyan sang iya amay ang suspek nga si Rolly Lorico kag nagkilalahay lang sila sa sugalan.
Sa nakalab-ut nga impormasyon kay Nene, may utang ang suspek sa iya amay sa namatyan kag wala siya nakabayad gani ini ang ila ginbaisan. — Aksyon Angel Mae Ciudad/Robert Nietes
