ILOILO—Gingapos, ginkastigo kag ginkawatan sang lima ka mga suspects ang Indian national nga manukot kuntani sang bayad sa iya pautang sa tag-iya sang kalan-an sa Brgy. Ilaya Poblacion, Barotac Nuevo las-9 kahapon sang aga.
Suno kay Police Major Jose Nemias Pamplona, hepe sang Barotac Nuevo Municipal Police Station, manukot kuntani ang biktima nga si Gucharan Bathal, 31-anyos sang North Fundidor, Molo sa tag-iya sang kalan-an nga si Maria Luisa Dagala.
Pero sang nagsulod na sa kalan-an, gulpi lang ginsiraduhan sang isa sa mga suspects nga si Anthony Quino ang puwertahan kag gingapos ang Indian national sang tatlo ka mga lalaki, suno kay Pamplona.
Pasado las-11 sang aga, nag-report sa police ang lima kag nag-alegar nga may gin-hold sila nga Indian National tungod nga nagpangawat sang mga gamit kag mga alahas sa tag-iya sang kalan-an.
Gilayon naman nga ginpadulungan sang police ang lugar kag naabtan nga wala na nakagapos ang Indian national.
Gin-usisa naman sang police ang natabo kag natukiban nga wala sang may nadula sa kalan-an. Sa pag-imbestigar sang police natukiban man nila nga nadulaan sang P10,000 nga cash kag cellphone si Bathal.
Gintudlo sang Indian national ang lima nga amo ang nagkuha sang iya mga gamit.
May mga gasgas man sa tuhod ang biktima.
Gin-aresto sang Barotac Nuevo police ang lima ka mga suspetsado nga kanday Adorico Bartolome, Rodeo Antiojo, Magno Locsin, Dagala kag Quino.
Ginpahayag ni Pamplona nga indi kilalahay ang lima ka mga nadakpan.
Ginapreparar na ang kaso nga robbery batok sa lima ka mga suspetsado nga preso sa Barotac Nuevo Municipal Police Station.
