ILOILO– Plastado na ang tanan nga mga kinahanglanon sang Iloilo City Commission on Elections (Comelec) para sa filing sang Certificate of Candidacy (COC) para sa Barangay kag Sangguniang Kabataan (SK) Elections sa Agosto 28 tubtob Setyembre 2.
Suno kay Iloilo City COMELEC Election Asst. II Jonathan Sayno, ginlibot nila upod sa taga-Iloilo City Police Office (ICPO) kag gin-check ang duha ka Cinemas sang Robinsons Mall sa City Proper nga amo ang venue sa mga kandidato sa syudad nga ma-file sang COC.
Ginpahayag ni Sayno nga mabukas ang City Comelec las-6 sa aga pero ma-umpisa sila sa pagbaton sang COC las-8 sa aga. Mahimo magpadulong ang mga ma-file sang COC temprano pa agud makalinya sa 2nd floor sang mall sa car park.
Ginpahanumdom niya ang ma-file sang COC, “Dapat ang COC prescribed form ina nga halin sa Comelec, dapat naka-fill out na [ang kandidato kag] kun wala ikaw isabat butangan mo gid nga ‘not applicable’. Kun may mga erasures butangan sang signature sang kanditato. Kag ang imo nga dala [nga COC] dapat nanotaryohan na. Ang aton nga COC form may ara worth 30 pesos nga documentary stamp and then ang following copies isulat lang ang number sang documentary stamp kag may ara kita nga photograph nga passport size nga latest nga nakuha within 6 months.”
Kun may mga kulang ang kandidato sa pagpasa sang COC form, ibalik ini sang Comelec suno kay Sayno. I-deny naman nila ang mga ma-file sang COC sa SK nga underage kag kun indi registered voter.
Antes makapasa sang COC form sa venue sang City Comelec may yara sila sang personnel nga ma-verify anay agud mahibaluan kun kulang ukon ensakto ang form, suno kay Sayno.
Ginapaabot sang City Comelec nga maglab-ut sa 6,000 tubtob 7,000 ang ma-file sang COC sa BSKE, suno kay Sayno.
Maumpisa naman ang campaign period sa Oktubre 19 tubtob 28. Hiwaton ang eleksyon sa Oktubre 30.
