IPPO, gina-assess pa kon matukod sang SIT sa kaso sa nasapwan nga sunog nga bangkay sa Pavia

Gina-assess pa sang Iloilo Police Provincial Office kon matukod sang Special Investigation Team ukon SIT sa kaso sang nasapwan nga sunog nga bangkay sa Green Meadows subdivision sa Barangay Ungka 1, Pavia sang Abril 29 sang kaagahon.

 Suno kay Police Lieutenant Colonel Rolando Araño, spokesperson sang IPPO, bisan wala pa sang SIT nagpadala na sila sang dugang nga mga imbestigador agud magbulig sa imbestigasyon sang Pavia police.  

Ginplastar man ni Araño nga may mga initial na sila nga identity sa sunog nga bangkay apang nahulat pa ang kumpirmasyon sa mga scientific evidence.         

Matandaan nga nagguwa ang ngalan ni Frank Rois Barbasa tungod sa nakita nga ID, mga 70 tubtob 80 metros ang kalayuon halin sa nasunog nga bangkay nga nasapwan.  Sa subong, wala pa naka-contact sa iya pamilya si Barbasa. — Aksyon Angel Mae Ciudad