Nadakpan nga nagagamit sang kuryente sa daan nga barangay hall ang kagawad sa Brgy. San Pedro, Molo sang Agosto 13.
Suno kay Mr. Bernard Bierneza, liason officer sang Task Force Boltahe sang Iloilo City Government, nag on-the-spot inspection sila sa mga barangay facilities kag naaktuhan sang personnel nga naga-angut ang extension wire pakadto sa balay sang kagawad.
Gin-isyuhan sang certificate sang Task Force Boltahe si Kagawad Alvrin Jaranilla sa paglapas sa Republic Act 7832 ukon ang Anti-Electricity and Electric Transmission Lines/Materials Pilferage Act of 1994.
STATEMENT NI KAGAWAD ALVRIN JARANILLA
Gin-ako ni Kagawad Alvrin Jaranilla sang Brgy. San Pedro, Molo nga nag-angut siya sang extension cord sa outlet sa sulod sang daan nga barangay hall.
Suno kay Jaranilla, nag-angut siya sa outlet sa sulod sang daan nga barangay hall tungod wala sang kuryente ang iya shop.
Ginpahayag niya nga nag-ayo siya kay Punong Barangay Karl Lapascua nga temporaryo maangut sang extension cord sa outlet agud makagamit sang kuryente.
Tatlo pa lang ka adlaw nga naga-angut sa daan nga barangay hall si Kagawad Jaranilla.
Ginkumpirmar man ni Kapitan Lapascua nga nag-ayo sa iya ang kagawad sa paggamit sang kuryente sa barangay hall. — Aksyon Paula Elambayo
