Laborer patay sang ginbuno sang kaupod sa ilimnan sa San Joaquin; suspek na-akig tungod gin-utod sang biktima ang higot sang duyan

ILOILO — Naakig ang 40-anyos nga suspek tungod gin-utod sang biktima ang higot sang ginahigdaan nga duyan sa Brgy. Cata-an, San Joaquin kagab-i, Sept. 2.

Ini ang rason sang pagpangbuno ni alyas Oliver sa biktima nga si alyas Jemark, suno kay Police Corporal Jonald Bornales imbestigador sang San Joaquin Municipal Police Station.

Sa imbestigasyon sang police, upod nga nag-inum inom si Oliver kag Jemark lakip ang iban pa nila nga upod sa obra antes ang pagpangbuno.

Lunsay mga laborer ang duha, suno sa police.

Pagkatapos nag-inum, nagapahuway sa duyan si Oliver sang gulpi lang gin-utod ni Jemark ang higot gani nga nahulog siya.

Tungod sini, may komosyon nga natabo sa tunga nanday Oliver kag Jemark. Gindala sa guwa sang isa pa ka upod si Jemark agud ma-untat ang komosyon.

Ginpahayag sang police nga liwat nag-inum sa tyangge si Jemark kag ang ila upod sang ginsundan ni Oliver kag ginbuno sa dughan.

Dead-on-arrival sa ospital si Jemark samtang nagpalagyo si Oliver nga padayon ginapangita sang kapulisan. — Aksyon Paula Elambayo