ILOILO CITY — Napilas ang tudlo sang 56-anyos nga lalaki nga ginhandusan sang butcher knife sang iya kasilingan samtang nagapanilhig sa guwa sang ila balay sa Brgy. Dulonan, Arevalo mga las-7:45 kahapon sang aga.
Ginkilala ang biktima kay Jose Maculada Jr. samtang suspect si Janjan Lima, ginabanta 30-anyos ang edad.
Suno kay Maculada, gina-uyatan niya sa iya tuo nga kamot ang silhig nga bukog samtang sa iya wala nga kamot ang iya nga cellphone tungod may gina-istorya siya.
Samtang naga-istorya, gulpi nakabalikid si Maculada kag nakita si Lima nga handusan na siya sang butcher knife.
Na-igo kag nabuka ang cellphone ni Maculada kag napilas ang iya kamalingking.
Ginalantaw niya nga kon wala nasagang sang iya cellphone ang kutsilyo, sa ulo kuntani siya ma-igo.
Pagkatapos sang natabu, ginbilin sang suspect ang butcher knife sa angkar-angkar kag naglakat papauli.
Nagtawag sa Emergency 911 ang amay ni Maculada kag gilayon nga nagresponder ang mga police.
Nagapati si Maculada nga may tuyo gid ang suspect nga labu-on siya tungod kon wala nasagang sang iya kamot ang kutsilyo sa ulo gid siya ma-igo.
Ginpabutyag man niya nga wala sila sang daan nga hiligut-anon pero may mga istorya siya nga nabatian nga nagagamit sang illegal nga druga ang suspect nga amo ang rason sang iya pagpulaw asta kaagahon.
Dugang niya nahadlok man sa suspect ang mga trisikad driver nga nagapamasahero kon kaagahon tungod masami siya nagapanggamo dala ang ice pick, batuta ukon kutsilyo.
Arestado ang suspect kag napasakaan na sang kaso nga frustrated murder. — Aksyon Maria Kayla Tingzon
