ILOILO CITY — Patay ang wala pa makilal-an nga lalaki sang nalasakan sang pick up sa Diversion road sakop sang San Rafael, Mandurrio la-1:15 sang kaagahon.
Suno kay Patrolman Arman Angcoy, traffic investigator sang Mandurrio Police Station, naghigda ang lalaki sa highway gani nalasakan sang pickup nga halin sa General Luna kag nagapakadto sa Ungka ang direksyon.
Posible wala natalupangdan sang driver ang nagahigda nga lalaki tungod mataas ang iya salakyan kag indi kitaon, suno sa police.
Indi pa matumod kun ano ang natabo sa biktima antes naghigda sa karsada, suno sa police.
Wala sang IDs ang biktima gani nabudlayan ang police sa pag-identify sa iya.
Ginpahayag sang police nga nagasuksok sang maroon nga jogger pants ang lalaki, may tsinelas, may dala nga itom nga tshirt nga wala niya ginasuksok, nagataas sang ginabanta 5’4 kag maniwang.
Ginapanawagan sang police ang pamilya ukon nakakilala sa biktima nga makig-angut sa ila.
Gin-custody sang police ang 31-anyos nga driver sang pickup. — via Aksyon Farrah Mae Morano
