ILOILO— Dead-on-arrival sa ospital ang 50-anyos nga llamador sang bulangan sang gintiro sang riding-in-tandem sa Brgy. Balabag, Dumangas las-6:20 kagab-i, Marso 27.
Ginkilala ang napatay kay Melvin Panes sang Poblacion Ilawod, Passi City nga may igu sang pagkatiro sa nawong kag dughan.
Suno kay Police Staff Sergeant Ramon Baylo, imbestigador sang Dumangas Municipal Police Station, halin sa bulangan ang biktima sakay sa iya motorsiklo kag may angkas nga isa pa gid ka llamador.
Pag-abot sang biktima malapit sa highway sang Balabag, gulpi lang may nagtupad nga riding-in-tandem kag gintiro siya sang angkas.
Duha ka lupok sang pusil ang nabatian sang mga residente sa palibot, suno sa police.
Pagkatapos sini, liwat nga gintiro sang suspect ang biktima tubtob natumba ang ila ginasakyan nga motorsiklo. Wala naman gintiro sang mga suspect ang angkas ni Panes.
Gilayon nga nagpalagyo ang mga suspect padulong sa direksyon sang Bangga Bante, suno sa police.
Sa subong, maid-id nga gina-imbestigaran sang police ang motibo sa pagpangtiro sang wala pa makilal-an nga mga suspects.– via Aksyon Farrah Mae Morano
