LTO ginsuguran na ang pag-phase out sang mga traditional jeepneys sa Iloilo City nga wala pa nakasulod sa kooperatiba

Ginsuguran na sang land transportation office ang pag-phase out sang mga traditional jeepneys nga wala pa nakasulod sa kooperatiba sa siyudad sang Iloilo.

Ini ang ginkumpirmar sang dispatcher sang Mohon Terminal Jeepney Operators sa Arevalo kasunod sang kakulang sang mga jeeps nga nagabiyahe Mohon-Iloilo City Loop nga nagresulta sa paggutok sang mga pasahero sa terminal kahapon sang aga, Pebrero 13.

Ang pag-phase out sang mga traditional jeepneys kag ilisan sang modernized jeeps kabahin sang PUV modernization program sang gobyerno.  

Wala na gin-renew sang LTO ang license to operate sang mga traditional jeepney units nga may plate number nga nagatapos sa number 1.   

Sa pagpangusisa sang Aksyon Radyo Iloilo, masobra 30 ka mga traditional jeeps nga may biyahe Mohon-Iloilo City Loop ang gin-phaseout sang LTO.