ILOILO — Ginpamatbatan nga guilty sa kaso nga Grave Misconduct kag gin-dismiss sang Office of the Ombudsman sanday Zarraga Mayor Jofel Soldevilla kag Vice Mayor Michael Omar Lacson.
Base ini sa desisyon nga ginpaguwa ni former Ombudsman Samuel Martires nga na-fetsahan sang Septiyembre 12.
Nag-ugat ang kaso sa reklamo nga gin-file ni former SB Member Andre Bon Sumagaysay may kaangtanan sa paghatag sang otoridad sang Sangguniang Bayan kay Soldevilla sang 2023 nga magsulod sa agreement agud magbakal sang duta para sa Local Shelter Plan (LSP) sang banwa.
Nakapangalan sa amay ni Lacson ang propedad nga nabakal sang banwa.
Si Lacson nga sadto anay Sangguniang Bayan member kag chairman sang Housing Committee ang nag-sponsor sang resolution nga naghatag sang otoridad kay Soldevilla.
Miembro man siya sang Ad Hoc Appraisal Committee nga amo ang nagdeterminar sang propedad para sa LSP.
Ginpamatbatan man nga guilty para sa Simple Misconduct kag gin-suspend sang anum ka bulan sanday SB members Nelida Octacviano, Jose Jeffren Millan, Rolando Papa, kag Mark Adrian Sulolayon lakip na sanday Municipal Budget Officer Glezil Mae Lozañes, Munipal Accountant Era Lerdon, kag Municipal Treasurer Leonora Pauya.
Ginapabayad naman sang kantidad nga equivalent sa iya anum ka bulan nga sweldo si Papa nga napiyerde sang 2025 elections. — Aksyon Khenjo Terco
