ILOILO — Ginapadalman sang San Enrique police ang impormasyon nga may daan nga hiligut-anon sa tunga sang mag-amay nga suspek sa pagpangbuno sa fish vendor sa Brgy. Poblacion Ilaya, San Enrique kahapon sang kaagahon, Oktubre 14.
Suno kay Police Lieutenant Christy Val Dalde, officer-in-charge sang San Enrique Municipal Police Station, halin sa namatyan ang biktima kag papuli na sang naglabay sa balay sang mga suspek.
Ginpahayag sang police nga may komprontasyon sa tunga sang biktima kag sang bata nga nagatambay sa guwa sang balay tubtob nga ginsumbag sang biktima ang bata kag nagtinapungulay.
Nakit-an sang amay kag sang utod ang natabo gani nagbulig sa ila himata paagi sa pag-uyat sa magtimbang nga kamot sang biktima kag ginbuno.
Lunsay yara sa impluwensiya sang makahulubog nga ilimnon ang biktima kag suspek, suno sa police.
Patal nga pilas sa dughan ang naagum sang biktima nga gindala sa ospital pero gindeklarar dead-on-arrival.
Preso sa San Enrique Police Station ang mag-amay nga natalana pasakaan sang kaso nga murder.
