Maestro sa Oton National High School nga ginreklamo nagpangmolestiya sang estudyante ginpangayuan sang paathag sang DepEd Iloilo

ILOILO — Ginpangayuan sang paathag sang Department of Education (DepEd) Iloilo Schools Division Office ang maestro sang Oton National High School nmga ginreklamo sang estudyante sang pagpangmolestiya.

Suno sa reliable source sang Aksyon Radyo Iloilo, nag-issue sang Order to Explain ang Iloilo SDO sa maestro.

Ginhatagan ang maestro sang 72 oras nga magsabat.

Ginpaidalom sa Alternative Modality of Learning (AML) ang estudyante nga involved samtang isaylo sa District Office ang maestro bilang kabahin sang reassignment order nga ginhimo sang SDO samtang nagapadayon ang imbestigasyon.

Una na nga naglapta sa social media ang reklamo sa maestro nga nagmolestya sa estudyante.

Samtang naga-conduct man sang imbestigasyon ang mga pulis sa Oton sa amo nga reklamo.

Gintinguhaan sang Aksyon Radyo Iloilo nga makuhaan sang statement ang maestro nga gina-reklamo apang wala pa nakahatag. — ARI trainee Robert Nietes