Mag-abyan nga ginakabig HVI drug personalities dakup sa buy bust operation sa Nabitasan, La Paz

ILOILO CITY — Na-recover ang P408,000 nga balor sang suspected shabu sa buy bust operation sang Iloilo City Police Station 2-Station Drug Enforcement Team sa Brgy. Nabitasan, La Paz las-2:30 kaina sang kaagahon.

Main subject sa operation si alyas John Mark, 23-anyos sang Brgy. San Isidro, Jaro. Gindakup man ang iya upod nga si alyas Ronel, 25-anyos sang Brgy. Bolilao, Mandurriao.

Suno kay Police Captain Jeffrey Delgado, officer-in-charge sang Iloilo City Police Station 2, involved si John Mark sa pagpang-hold up sa empleyado sang J&T Jaro sang 2022 kag pagpangawat sa establisyemento.

Nag-abot man sa area ang Explosive Ordnance Division tungod nakuhaan si John Mark sang 40mm High Explosive Grenade Launcher Cartridge.

Magapangatubang sa kaso nga paglapas sa RA 9516 ukon illegal possession of explosives kag RA 9165 ukon Comprehensive Dangerous Drugs Act of 2002 ang mga nadakpan. — ARI trainee Robert Nietes