Mag-asawa, ila 15-anyos nga bata nga lalaki patay sang nalumos sa suba sa Brgy. Canabajan, Calinog

ILOILO — Patay ang iloy, amay kag ila 15-anyos nga bata nga lalaki sang nalumos sa suba sa Barangay Canabajan, Calinog mga las-8 kaina sang aga.

Suno kay Mr. Rodolfo Valencia, head sang Calinog Municipal Disaster Risk Reduction and Management Office (MDRRMO), matabok sa suba ang magpamilya tungod mangtapas kuntani sang tubo.

Tungod madalom ang tubig, wala nagtabok ang truck nga ginasakyan sang magpamilya kag iban pa nila nga mga upod.

Samtang nagatabok, gin-anod ang tsinelas sang 15-anyos gani ginlagas niya tubtob gin-anod siya.

Gintinguhaan sang iloy nga malagas ang iya bata pero gin-anod man siya. Pagkakita sang amay sa natabu, nagbulig siya pero nalumos man.

Naglawig sang malapit isa ka oras ang search operation antes nakita ang bata sa amo man nga barangay. Masobra isa ka oras naman antes nakita ang lawas sang mag-asawa sa Barangay Quinagaringan, Passi City.

Base sa impormasyon, may bata pa ang mag-asawa nga nagpabilin sa bubon kag wala nagtabok.

Indi kabalo maglangoy ang magpamilya. — Aksyon Maria Kayla Tingzon