Gin-refer sa ospital sa Iloilo City ang mag-asawa nga nakabunggo sa nagapaliko nga truck sa Barangay San Isidro, Buenavista, Guimaras kahapon sang aga, Agosto 18.
Taga- Brgy. Hibaoan Norte, Mandurriao ang mag-asawa nga naga-edad sang 57-anyos kag 53-anyos.
Suno kay Police Senior Master Seargent Jay Padilla, imbestigador sang Buenavista Municipal Police Station, maliko kuntani pa-tuo ang truck sang munisipyo nga nagapanghakot sang basura pero wala naka-signal tungod guba ang signal light sini.
Dugang pa sang police, wala naman nakita sang mag-asawa nga sakay sang motorsiklo nga maliko ang truck rason nga nagdiretso sila kag nakabunggo sa bumper sang truck.
Pabalik na kuntani sa munisipyo ang truck nga nagdul-ong sang basura sa Barangay Agsanayan samtang pakadto naman sa Old Poblacion ang motorsiklo nga nagalibot-libot sa lugar.
Nakaagum sang injury sa ulo ang mag-asawa samtang yara naman sa kustodiya sang Buenavista Municipal Police Station ang driver. — via Aksyon Maria Kayla Tingzon
