ILOILO— Nadakpan sa drug buy bust operation sa Zone 3, Brgy Tacas, Jaro ang mag-utod nga nagabuligay sa pagbaligya sang illegal nga druga kagab-i.
Ang mga nadakpan amo kanday alyas Emil, 33-anyos; kag alyas Boy-boy, 31-anyos nga pareho residente sang amo man nga lugar.
Suno kay Police Captain Roque Gimeno III, head sang City Drug Enforcement Unit (CDEU), si Emil ang main target sa ila nga operasyon kag amo ang naga-uyat sang illegal nga druga.
Kon masako si Emil, ginasugo niya si Boy-boy nga mag-deliver sang illegal nga druga. Kon kaisa, ang iya duha ka menor-de-edad nga bata ang ginasugo ni Emil sa pagdul-ong sang drugs.
Sa pagpangusisa sang pulis, ginatabo ni Emil sa Uhong-uhong sa Buhang, Jaro ang illegal nga druga. Halin naman sa preso sa BJMP-Ungka ang contact sang mag-utod.
Sa operasyon, na-recover ang 70 grams sang suspected shabu nga may standard drug price nga P473,000. — Aksyon Farrah Mae Morano
