Magbayaw nakuhaan sang masobra P1 million nga balor sang suspected shabu sa buy bust operation sa Mandurriao

ILOILO CITY — Na-recover ang P1,360,000 nga balor sang suspected shabu sa drug bust operation sang City Drug Enforcement Unit (CDEU) sa Zone 1 Brgy. Airport, Mandurriao kahapon, Oktubre 24.

Main subject sa operation si alyas Shaggy, 43- anyos sang amo nga lugar. Upod nga nadakpan ang bayaw sang subject nga si alyas Juni, 41-anyos sang Calaparan, Arevalo.

Suno kay Police Captain Roque Gemino III, head sang CDEU, halin sa New Bilibid Prison ang source sang ilegal nga druga sang mga nadakpan kag ginabaligya sa syudad sang Iloilo.

Nakaagi na nadakpan si Shaggy may kaangtanan sa illegal drugs pero nakaguwa paagi sa plea bargaining agreement.

Ginpabutyag ni Capt. Gemino nga ginadul-ong ni Shaggy ang iya bata sa eskwelahan kag nagadiretso sa balay sang iya ginikanan sa Mandurriao kag mag-operate sang ilegal nga druga.

Ginabanta nagabug-at sang 200 grams ang na-recover nga suspected shabu sa mga nadakpan. — Aksyon trainee Robert Nietes