ILOILO — Na-recover sang Janiuay police ang 14 grams nga kabug-aton sang suspected shabu, 12-gauge shotgun kag bullet vest sa balay sang drug subject sa Brgy. Madong, Janiuay las-5:40 kaina sang kaagahon.
Suno kay Police Captain Marlon Perez, officer-in-charge sang Janiuay Municipal Police Station, nabaklan sang isa ka sachet sang suspected shabu sa balor nga P6,800 ang subject nga si alyas Joey sa drug bust operation.
Pagkatapos sang transaksyon, ginserbihan sang search warrant ang subject tungod sa impormasyon nga may illegal items sa iya balay.
Ginpahayag ni Perez nga na-monitor si Joey tungod gintudlo sang subject nga nadakpan sa drug bust operation sa Brgy. Bongol, Janiuay sang Martes.
May impormasyon nga may nag-abot nga stock sang illegal drugs kay Joey, suno kay Perez.
Nagabalor sang P95,000 ang na-recover nga 14 grams sang suspected shabu.
Sa pagpangusisa sang Station Drug Enforcement Team sang Janiuay Municipal Police Station, drug surrenderer sang 2016 si Joey pero wala nakatapos sa rehabilitation program sang gobyerno.
Detained sa Janiuay Police Station ang subject kag natalana pasakaan sang kaso nga paglapas sa Republic Act 9165 ukon ang Comprehensive Dangerous Drugs Act of 2002 kag Republic Act 10591 ukon ang Comprehensive Firearms and Ammunition Regulation Act. — Aksyon Paula Elambayo
