Magpamilya dakup sa drug buy bust sa South Baluarte, Molo; masobra P1 million nga balor sang suspected shabu na-recover

ILOILO CITY — Masobra P1 million nga balor sang suspected shabu ang na-recover sa drug buy bust operation sa Barangay South Baluarte, Molo subong nga gab-i.

Suno kay Police Captain Roque Gimeno III, head sang City Drug Enforcement Unit (CDEU), kilala nga nagabaligya sang illegal drugs sa lugar ang mga nadakpan nga kanday alyas Rodman 26-anyos, iloy niya nga si alyas Ampay 53-anyos kag tiya nga si alyas Lyn, 49-anyos.

Na-recover sa operasyon ang 11 ka sachets kag apat ka dalagku nga pinutos sang suspected shabu nga ginabanta nagabug-at sang 150 grams.

Dugang ni Gimeno, ginabaligya sang mga nadakpan ang illegal nga druga sa bilog nga Molo.

May impormasyon na ang pulis may kaangtanan sa source sang magpamilya, pero wala pa ginbuyagyag tungod ila nga gina-monitor. — ARI trainee reporter Robert Nietes