Mangunguma nga may mga pilas sang pagkabuno nasapwan patay sa talamnan sa Sara

ILOILO — Tatlo ka pilas sang pagkabuno ang nakita sa bangkay sang lalaki nga nasapwan sa talamnan sa Barangay Preciosa, Sara las-6 kaina sang aga.

Ginkilala ang nasapwan kay Elmer Bansale, 36-anyos, mangunguma nga residente sang Pasig, Sara.

Suno kay Police Lieutenant Brett Balopiños, officer-in-charge sang Sara Municipal Police Station, may nakita nga bangkay ang residente sang nakalabay sa lugar gani gilayon nga nag-report sa pulis.

Sa pagpangusisa sang mga pulis, nag-inom si Bansale upod sang iya mga kaupdanan sa obra mga las-7 kagab-i.

Nagpauli siya sang makadali para magtig-ang kag nagbalik sa ila gina-imnan mga las-9 kag wala na makapauli sa ila balay.

Indi pag-intiendihanay tungod sa kahulugbon ang ginasundan nga anggulo sang kapulisan sa pagkapatay ni Bansale.

Ginapangita sang kapulisan ang mga upod ni Bansale inom agud mausisa.

Ginpabutyag ni Balopiños nga wala sang malain nga record sa barangay kag pulis si Bansale. — Aksyon Maria Kayla Tingzon