ILOILO— Patay ang 39-anyos nga mangunguma sang ginlabo sang iya man lang nga pakaduha samtang nagakatulog sa Barangay Morcillas, Tubungan sang Hunyo 9 sang gab-i.
Suno kay Police Captain Alberto Manguilimotan, Jr., hepe sang Tubungan Municipal Police Station, upod nga nag-inom-inum ang biktima nga si Journal Tacan sang Brgy. Lanag Norte, Tubungan kag suspek nga si Rodel Tabuloc, 41-anyos sang Brgy. Morcillas kag ang iban pa.
Sang natapos na ang pag-inum-inom, nagpadulong ang biktima sa payag sang iya man nga paryente agud magtulog, suno sa police.
Base sa imbestigasyon sang police, ginsulod naman sang suspek ang payag kag gintabunan lang kun tani ang baba sang biktima pero sang may nakita nga binangon, ginlabo niya sa liug.
Nag-surrender naman ang suspek sa police kag gin-ako nga ginhimo niya ang krimen tungod nasuya siya sa tinikal sang biktima sang nag-inum sila.
Preso na ang suspek kag natalana nga pasakaan sang kaso nga murder bwas, Hunyo 11. — via Aksyon Farrah Mae Morano
