ILOILO CITY— Masobra tunga sa milyon ka pesos nga balor sang suspected shabu ang na-recover sa drug buy bust operation sa Block 7, Brgy. Sinikway, Lapuz.
Ginkilala ang subject kay Franz Edward Arias, 27-anyos nga residente sang amo man nga lugar.
Suno kay Police Lieutenant Colonel Antonio Benitez, Jr. sang City Drug Enforcement Unit (CDEU), na-recover sa subject ang 32 ka sachet sang suspect shabu nga nagabug-at sang 90 grams kag may Standard Drug Price nga P612,000.
Ginpahayag ni Benitez nga ginapaagi lang sa bintana halin sa 2nd floor sang balay ang drugs kag ginahulog sa mga mabakal.
May mga nagabakal sang illegal drugs sa subject nga mga taga-Sinikway kag may yara man nga halin sa iban nga lugar, suno sa police.
Sa impormasyon ni Kagawad Francis Longno, napresu na sadto si Arias sa kaso may kaangtanan sa illegal drugs kag sang 2020 nakaguwa.
Suno kay Longno, madugay na nila ginahambalan ang subject nga maglikaw sa illegal activities.
Samtang naga-inventory ang mga pulis, ginturn-over sang pamilya sang subject ang isa ka box nga may unod nga mga drug paraphernalia nga ginalanag-iyahan sang subject.
Naga-ugtas ang pamilya, suno kay Benitez, tungod madugay na nga naga-engage sa illegal activities ang subject.
Nagapanginwala ang subject nga nagabaligya siya sang illegal drugs sang gindakup sang police.
