ILOILO — Nagbilin pa sang mensahe nga nagapangayo sang pasensya ang mga kawatan nga nagsulod sa Oton Central Elementary School kahapon sang kaagahon, Enero 15.
Suno kay Police Staff Sergeant Elvin Sañol, imbestigador sang Oton Municipal Police Station, nakita nila ang mensahe sa blackboard sa classroom sang grade II nga nakasulat, “Pasensya na. Wala kaming bigas. Kami ang magnanakaw”
Lima ka electric fan, isa ka aircon nga yara sa PTA office, kag isa ka flatscreen TV ang gintaban sang mga suspetsado.
Indi magnubo sa tatlo ang mga suspek suno kay Sañol tungod sa kabug-aton sang mga appliances nga ila nakuha.
Posible man suno kay Sañol nga sa kilid ukon sa likod sang eskwelahan nag-agi ang mga suspetsado.
Una nga nag-report sa ila, suno sa pulis, ang naka-on duty nga security guard tungod nakita niya nga bukas ang isa ka classroom sang siya ang naglibot sa area las 5:00 sang aga.
Gina-imbestigaran na sang Oton police ang insidente.
