ILOILO— Nag-agi sa kisame sa second floor sang Mr. DIY sa Passi City ang mga nagransak.
Ini suno kay Lieutenant Colonel German Magbanua III, hepe sang Passi City Police Station.
Base sa ila nga pagpangusisa, nag-agi sa ginakay-o nga balay sa likod ang mga suspek, nag-agi sa kisame sang Mr. DIY kag nagpanaug sa first floor.
Kaina sang aga, pagbukas sang assistant store supervisor natingala siya nga yara na malapit sa cashier area ang ila nga sales bag tungod sa iya nga pagkadumdom ginabutang ini sa sulod sang ila opisina.
Gilayon nga ginpadulungan sang assistant supervisor ang ila vault kag natukiban nga guba na.
Nakuha naman ang P116,000 nga income sang balaligyaan kahapon.
Padayon ang inventory sa mga nadula nga baligya sa sulod sang establishment.
Gintipon sang SOCO ang mga empleyado, mga construction workers kag supervisor para ma-check ang ila nga fingerprint.
Pagkatapos sang pagpangransak, nag-agi ang mga suspect sa kisame kag gingamit pa ang hagdan sang store.
Ginlantaw nga kagab-i natabo ang pagpangransak. — Aksyon Farrah Mae Morano
