ILOILO—Nadakpan ang online seller nga lalaki sa drug buy bust operation sa Barangay Libot, Calinog, Iloilo.
Ginkilala ang subject kay alyas Ken, 29-anyos, temporaryo nga naga-istar sa Mandurriao, Iloilo City, kag tumandok sang San Enrique.
Suno kay Police Lieutenant Gabriel Gilmer Manguera, hepe sang Calinog Municipal Police Station (MPS), online selling sang mga bayo kag kalo ang negosyo ni Ken, samtang nagabaligya sang shabu sa iya nga kustomers.
Nabaklan sang sachet sang ginapatihan shabu si Ken kag nakumpiskar ang ginabanta 60 ka gramo nga suspected shabu nga may estimated Standard Drug Price (SDP) nga nagabalor ₱408, 000.
Ginkabig nga High Value Individual (HVI) ang subject.
Sa imbestigasyon sang pulis, ga-deliver si Ken sang illegal nga druga sa banwa sang Calinog kag Lambunao.
Ginabanta isa ka bulan ang intelligence surveillance sang kapulisan kay Ken antes nadakpan.
Gin-custody sa Calinog MPS si Ken kag natalana nga magapangatubang sang kaso tungod sa paglapas sang Republic Act 9165 ukon ang Comprehensive Dangerous Drugs Act of 2002.
Ginpaidalum sa medical test ang subject.
Padayon pa ang imbestigasyon sang pulis natuhoy sa source sang subject kag rason sa pagpamaligya sang ilegal nga druga.
