ILOILO — Mga kabanwahanan sa Quinto Distrito sa probinsiya sang Iloilo ang na-monitor nga ginabaligyaan sang subject nga nadakpan sa buy bust operation sa Brgy. Batad Viejo, Batad las-9:43 kagab-i.
Ini suno kay Police Captain John Predic Padilla, hepe sang Batad Municipal Police Station.
Suno kay Padilla, nagdugay sang isa ka bulan ang monitoring sa subject tungod wala nagatinir sa Batad kag makakadto lang kon may transaksyon sa iya mga parokyano.
Ang subject amo si alyas Janjan, residente sang Zone 2 Poblacion, Estancia kag may utod nga nadakpan na sang Iloilo Provincial Drug Enforcement Unit (PDEU) sang Agosto 10 sa Estancia.
Ginpahayag ni Padilla nga nagahalin sa Estancia kag Iloilo City ang supply sang illegal drugs sang subject.
Sa pagpangusisa sang police, madugay na naga-engage sa illegal drugs si Janjan upod ang iya utod. Padayon nga ginahibalo sang police kon may iban pa nga kaupdanan ang subject sa ilegal nga transaksyon.
Nagabug-at sang 250 grams ang na-recover nga suspected shabu sa subject nga nagabalor sang P1,700,000. — Aksyon Paula Elambayo
