Na-videohan sang concerned citizen ang rumble sang mga kalalakihan samtang nagapaguwa siya sa Gaisano ICC Grounds lapit sa stoplight sa Brgy. San Rafael, Mandurriao kahapon sang kaagahon, Agosto 10.
Suno sa concerned citizen nga nagpadala sang video sa Aksyon Radyo Iloilo, una nga nagsinggitanay ang kalalakihan tubtob nga nagsinumbaganay.
Ginpahayag sang concerned citizen nga may mga dala nga kahoy ang mga involved kag nakasakay sa duha ka pick-up.
Sa pagpangusisa sang Aksyon Radyo Iloilo news team sa Police Station 10, nakaresponder ang kapulisan pero wala na naabtan ang mga involved sa rumble.
INDI KILALA
Sa exclusive interview sang news team kay alyas Jepoy nga upod sang isa ka grupo, indi nila kilala ang mga lalaki nga nagbakol sa ila.
Sa panaysayon ni Jepoy, siyam sila nga magbarkada nga nagkadto sa balay ilimnan. Pasado las-3:40 sang kaagahon sang naguwa ang grupo nanday Jepoy kag nagdiretso sa ila ginasakyan nga puti nga pick-up.
Wala pa naghalin kanday Jepoy tungod ginahulat pa ang upod nila nga nagpangihi.
Suno ka Jepoy, nabatian nila ang pagbinaisay sang mga lalaki sa itom nga pick-up antes pa nakalab-ut sa stoplight.
Dyutayan lang maglab-utanay ang mga lalaki sa itom nga pick-up kag sa ila ginabais pero may natambag, suno pa kay Jepoy.
Paguwa na sa Gaisano ICC Grounds kanday Jepoy sang nagtuparay ang ginasakyan nila nga puti nga pick-up sa itom nga pick-up.
Nakibot kanday Jepoy sang gulpi lang nagpanaug halin sa likod sang itom nga pick-up ang mga lalaki kag ginbakol kag ginsumbag sila nga nagasakay sa likod sang puti nga pick-up.
Ginpahayag ni Jepoy nga may dala nga dos por dos ang mga lalaki kag may isa sa ila nga nagpaguwa sang kutsilyo gani nagdinalagan sila sa kilid sang pick-up.
Tungod sini, nag-amat amat sakay sa likod sang pick-up nga itom ang mga lalaki nga nag-beating the red light pa sang nagpalagyo. — Aksyon Paula Elambayo
