ILOILO — Ginapanan-aw nga hungod ang pagbunggo sa mag-asawa nga na-hit and run sang sports car sa atubang sang Monticello Intimo subdivision sa Barangay Pandac, Pavia, Sabado sang gab-i.
Suno kay Police Major Dajie Delima, hepe sang Pavia Municipal Police Station, una na nga na-side swipe sang amo man nga sports car ang asawa antes sila ginbungguan.
Sa panaysayon sang asawa, ginpahayag ni Delima nga naga-angkas siya sa bisekleta nga ginadala sang iya bana, sang nabatyagan niya nga nagabiring ang iya paa gani nagpanaug siya, naglakat na lang siya kag didto na nasaga-iran sang nagapadulong nga sports car.
Dugang pa ni Delima, ginsinggitan sang bana ang driver nga nagpundo sa unhan. Sa pagpanumdum sang mag-asawa nga balay na ato sang driver ginpalapitan nila kag didto na nagsugod ang kumprontasyon. Nakita man nila nga may duha pa ka mga sakay sa likod kag front seat ang salakyan.
Ginsaysay man sang asawa sa police nga siya kuntani ang ma-istorya sa driver pero sang nagpresentar ang iya bana nga siya na lang, ginwakli siya sang driver kag natumba.
Nakita niya na lang nga naglakat ang salakyan kag nag-U turn pabalik sa ila kag ginbungguan tubtob nayudyudan ang iya bana kag ang bisekleta nga nagkalabali.
Matindog pa kuntani ang asawa pero gin-atrasan siya sang salakyan.
Una na nga na-obserbaran sang mag-asawa nga yara sa impluwensiya sang makahulubog nga ilimnon ang driver.
Na-identify na sang asawa ang sports car pero sang ginpakita sa iya ang picture sang ginakabig nga person of interest sang Pavia police, indi pa niya ini makumpirmar tungod nagapaayo pa siya sa ospital kag nagalingin pa ang iya ulo.
Napatay mga las-3 kahapon sang kaagahon ang bana samtang ginabulong sa ospital.
Sa imbestigasyon sang police, halin sa Bangga Singko ang mag-asawa nga naga-angkasanay sa mountain bike sang nabungguan sang sports car nga halin sa C1 Road.
May nakakita man nga isa pa gid ka driver nga nagasunod sa sports car nga nagliko sa Deca Homes Phase 3, suno sa police.
Sa pagpangusisa sang police sa subdivision, wala man sang residente nga nagapanag-iya sang amo nga sports car. — via Aksyon Maria Kayla Tingzon
