ILOILO CITY — Ginmandu ni Iloilo City Mayor Jerry Treñas nga butangan sang bollards ukon harang ang bike lanes sa Diversion Road, Mandurriao.
Suno kay Mayor Treñas, nagmandu na siya sa taga-City Engineer’s Office nga magbutang sang bollards agud indi malabayan sang mga salakyan ang bike lanes.
Nakalab-ut sa alkalde ang concern sang isa ka netizen nga ginareklamo ang private vehicle nga naka-park sa bike lane sa Taft North, Mandurriao.
Nagmandu man si Treñas sa PSTMO nga i-apprehend ang driver sang salakyan.
Ginpabutyag man ni PSTMO head Jeck Conlu, nga napaandaman na nila ang driver sang salakyan sang nagligad nga semana.
Sa pagkamatuod suno kay Conlu, may gin-apprehend pa gid sila kagab-i nga taxi nga naka-park sa ginhalinan nga puwesto sang pribado nga salakyan.
Base sa monitoring sang PSTMO, late night ukon early morning naga-park ang nasambit nga mga salakyan.
