ILOILO — Dead-on-arrival sang gindala sa ospital ang 14-anyos nga solterito nga nalumos sa Sitio Bool, Barangay Sapao, Dumangas pasado kahapon, Agosto 13.
Suno kay Police Staff Sergeant Terence Sorio, imbestigador sang Dumangas Municipal Police, upod sang biktima ang iya pamilya nga nagpaligo sa dagat.
Wala natalupangdan sang pamilya nga nakalab-ut na sa madalom nga porsyon sang dagat ang solterito upod sa iya 12-anyos nga manghod nga babaye.
Sa imbestigasyon sang police, una nga nabudlayan sa paglangoy ang 12-anyos kag ginsalbar lang sang 14-anyos. Pagkatapos nasalbar ang manghod, ang solterito naman ang nagsururot sa tubig.
Masobra isa ka oras nga ginpangita ang solterito suno sa police tubtob nakit-an siya sang pamilya.
Luwas na sa katalagman ang 12-anyos, suno sa police.
