Tag-iya sang mga illegally-parked vehicles sa Iloilo City ipa-apprehend ni Mayor Jerry Treñas

Ginmandu ni Iloilo City Mayor Jerry Treñas sa Public Safety and Transportation Management Office (PSTMO) nga dakpon ang mga tag-iya sang mga illegally parked nga salakyan ukon ang mga naga-parking sa lugar nga wala ginapahanugutan.

Paagi sini, mapakita sang mga personnel sang PSTMO suno sa alkalde nga wala sila ginabayaran sang mga tag-iya sang salakyan agud maka-illegal park.

Lakip sa mga gintumod ni Mayor Treñas nga lugar nga indi dapat pag-parkingan sang salakyan ang mga bike lanes.

Suno sa alkalde, dapat ipakita sang personnel sang PSTMO nga may pulos ang pagpasweldo sa ila sang mga pumuluyo sang siyudad.

Ginpahayag man ni Treñas nga disappointed siya sa taga-PSTMO tungod kinahanglan pa nga tawgon sang netizens ang ila atensiyon antes sila mag-aksyon.

“I am utterly disappointed with our PSTMO since our netizens have to call them out before they act,” suno kay Mayor Treñas.

Sang damglag lang, naglapta sa social media ang picture sang pribado nga salakyan nga naka-park sa bike lane sa Taft North, Mandurriao.

May gin-apprehend man nga taxi ang taga-PSTMO nga nag-park man sa ginhalinan sang pribado nga salakyan.