ILOILO CITY — Napatay si Mel Carreon nga ginbansagan nga “perennial candidate” kada-eleksyon sa edad nga 84.

Ini ang ginkumpirmar sang nagabantay kay Carreon nga si Kaykay. Si Kaykay kag ang iya nga bana ang nagalantaw kay Carreon kag nagahatag sang pagkaon.

Suno kay Kaykay, nakita na lang sang iya nga bana nga napatay si Carreon sa iya balay sa Oñate deleon, Mandurriao.

Antes sini, gin-admit sang 15 ka adlaw sa ospital si Carreon tungod naglain ang iya pamatyag. Isa na ka semana kag nakagwa sa ospital si Carreon.

May bukol sa ulo kag kidney stone si Carreon, suno sa doktor.

NGAA KILALA SI MEL CARREON SA ILOILO CITY?

Perennial candidate ang ginabansag sa indibidwal nga permi nagapapili sa eleksyon ugaling malaka ukon wala gid nagadaog.

Si Carreon ang nakilala tungod 13 ka beses na nga nagpadalagan sa mga eleksyon apang wala nakaagi daug.

Pinakaulihi siya nagpadalagan sang 2025 midterm elections sa pagka-kongresista sa siyudad pero napierde.

Nagpadalagan siya sa pagka-konsehal sang siyudad sang 2021.

Sang 2019, nag-file siya sang COC sa pagka-Senador apang nag-withdraw kag nagpadalagan sa pagka-Mayor sang Iloilo City.

Nakaagi man siya padalagan sa pagka-vice mayor sang siyudad kag nag-file man sang COC sa pagka-presidente. — Aksyon Marvin Malificiar/Farrah Mae Morano