PICAO Head Nerio Lujan padal-an sang imbitasyon ni Mayor Jerry Treñas agud maghimo ang lecture sa traffic management

Padal-an ni Mayor Jerry Treñas sang imbitasyon para maghimo sang walo ka oras nga lecture kag field demonstration sa traffic management si Public Information and Community Affairs Office (PICAO) head Nereo Lujan.

Suno sa alkalde, imbes P2,000 himuon niya P5,000 ang ihatag nga honorarium sa ma-lecture sa traffic management.

Ginpahayag ni Mayor Treñas nga malisensya siya kay Governor Arthur Defensor, Jr. para maka-lecture si Mr. Lujan.

Posible nga himuon sa weekend ang lecture agud makapamati ang mga traffic aides.

Dugang pa sang alkalde, unahon niya anay si Mr. Lujan kag tan-awon kun mag-improve ang traffic sa sulod sang isa ka semana kag liwat naman nga mangita sang gusto mag-lecture.

Matandaan nga nagpahayag si Mayor Treñas nga imbitahon niya ang mga kritiko nga maghimo sang lecture sa mga traffic aides. — via Aksyon Jeremae Ventar