Programa sa pagprotekta sa marine wildlife kag pagpasangkad sang responsable nga pagpangisda sa probinsiya ginlunsar sang Iloilo Provincial Government

ILOILO – Ginlunsar sang Iloilo Provincial Government ang inisyatibo sa pagpasangkad sang proteksyon sa marine wildlife kag responsable nga pagpangisda sa 19 ka mga coastal municipalities.

Ini amo ang Marine Wildlife Conservation, Bycatch Monitoring, and Stranding Response Program.

Ini nga inisyatibo sabat sa assessment sang United States National Marine Fisheries Service (USNMFS) sang natukiban nga may kakulangan sa monitoring sa mga marine mammals partikular sa Irrawaddy dolphin kag fishing activities sang blue swimming crab harvesting.

May nagakatabo nga bycatch kag stranding sa amo nga mga marine mammals, suno sa USNMFS.

Ang bycatch, amo ang incidental capture, injury ukon kamatayon sang marine wildlife sa tion sang pagpangisda samtang ang stranding nagatumod sa event kon diin nakit-an, na-trap ukon napilasan ang marine wildlife kag indi na makabalik sa iya natural habitat nga wala sang bulig.

Agud masolusyunan ang ini nga problema, gintukod ang Marine Wildlife Conservation, Bycatch Monitoring, and Stranding Response Task Force sa implementasyon sang programa.