ILOILO CITY — Patay ang 31-anyos nga pulis sang nakabunggo ang ginamaneho nga motorsiklo sa jeep sa Brgy. Dulonan, Arevalo las-4:40 kaina sang kaagahon.
Suno kay Police Senior Master Sergeant Rexie Diaz, imbestigador sang Iloilo City Traffic Enforcement Unit, pakadto sa Antique ang pulis sang nakabunggo sa kasugata nga jeep.
Naglikaw pa ang driver sang jeep sang nakita ang nagapadulong nga motorsiklo pero nalab-ut gid. Madasig ang pagpadalagan sang pulis sang motorsiklo, base sa imbestigasyon.
Posible wala nakahibalo ang pulis nga ginhimo one-lane ang karsada nga ginakay-o, suno kay PSMS Diaz.
Nagaranggo sang patrolman ang pulis nga na-assign sa Antique.
Detained sa Police Station 6 sa Arevalo ang driver sang jeep kag hingagawon ang pagpasaka sang kaso nga reckless imprudence resulting in homicide and damage to property. — Aksyon Paula Elambayo
