ILOILO—Nautod ang cross nga napatong sa spire (pinakatuktok nga parte sang tore) sang San Nicolas de Tolentino Parish Church sa Guimbal tungod sa mamadlos nga hangin nga may dala nga ulan kahapon sang hapon.

Suno kay Alvin nga care taker sa simbahan, hinali nga nagbaylo sa habagat ang huyop sang hangin mga las-4:30 sang hapon kag amo na lang sang nakit-an nga nautod ang cross.

Human sa semento ang cross nga nagataas sang masobra duha ka tapak kag nagalapad sang duha ka tapak nga proyekto pa ni former Mayor Oscar Garin sang 1990’s suno kay Alvin.

Base sa inisyal nga pagpangusisa sang Aksyon Radyo Iloilo news team sa Guimbal Municipal Disaster Risk Reduction and Management Office, naga-angut pa ang nautod nga cross sa kabilyada nga pormas sini gani wala natak-tak.

Nautod man ang parte sang mga tinabuan sang crossbar ukon ang nagapabalabag nga parte sang cross pero naga-angut pa sa kabilya.

Tubtob subong wala pa nakuha ang cross tungod madanlog ang spire kag ginapreparar pa ang crane nga gamiton agud makuha ang cross sa ibabaw sang spire. — Aksyon Marvin Malificiar