ILOILO — Estable na ang kondisyon sa ospital sang 29-anyos nga security guard sang gintiro sang barangay kagawad sa Tambaliza, Concepcion las-11 kagab-i, Hunyo 26.
Suno kay Police Captain John Michael Dalipe, officer-in-charge sang Concepcion Municipal Police Station, fiesta sa lugar kag nagapila agud mabayad sang entrance fee para sa aktibidad ang biktima nga si alyas AJ sang gulpi gintayaan kag gintiro sang suspect nga si alyas Jojo.
Nakaagum sang pilas sa tuo nga abaga ang biktima.
Sa impormasyon nga nakuha sang kapulisan, may daan nga hiligut-anon ang suspect kag pamilya sang biktima.
Dugang ni Dalipe nga sang nagligad nga tuig, ang utod naman sang suspect ang gintapungol sang kagawad.
Na-recover sa crime scene ang basiyo sang caliber 45.
Nagapabilin nga at-large ang suspect dala ang caliber 45 nga pusil. — Aksyon Maria Kayla Tingzon
