ILOILO CITY — Nagreklamo nga gin-holdup ang senior citizen nga doktora sa parking lot sang SM City pasado las 7:30 kagab-i, Sept. 3. Suno sa biktima, ginlampusan pa siya sang pusil sa ulo sang suspek.
Suno sa senior citizen nga doktora, may ginbakal siya nga mga utan kag prutas sa sulod sang SM City Mall kag pabalik na sa iya salakyan sa parking lot.
Nagpabulig sa bagger sang mall ang senior citizen kag nagpabutyag nga hulaton lang siya tungod kuhaon niya ang salakyan nga naka-park sa Gate 3.
Pero nagpabutyag ang bagger nga mas mahapos para sa senior citizen nga makaguwa kon indi na siya maglibot sa Gate 4 gani sa ulihi, gindul-ong siya sang bagger sa parking lot.
Sang nabutang na sa compartment sang salakyan ang iya mga ginpamakal, nagkadto sa driver’s seat ang senior citizen. Naga-isahanon ang senior citizen sang natabo ang pagpanghold-up.
Nakasulod na sa salakyan ang senior citizen pero wala niya ma-lock sang gulpi lang may nagbukas sa pwertahan kag gintayaan siya sang pusil sa wala nga porsyon sang iya lawas.
“Indi maggahod, hipos. Kwarta lang akon, kwarta lang akon” ang ginhambal sang suspek, suno sa senior citizen.
Nagpakitluoy pa ang senior citizen sa suspek antes niya ginkuha ang wallet sa sulod sang iya bag. Samtang ginakuha sang senior citizen ang mga P500 bills, gulpi lang ginbutong sang suspek ang iya wallet.
“Ginpungkoy” pa sa ulo sang pusil ang senior citizen antes nagdalagan ang suspek.
Sa kakulba nga balikan siya sang suspek, naguwa sa parking lot sakay sa iya salakyan ang senior citizen nga nagabusina. Nagpundo siya sa dalan kag nagpangayo sang bulig.
Ulihi na nabatyagan sang senior citizen nga may bukol na siya sa agtang.
May person of interest na nga ginasundan ang Iloilo City Police Station 10 kag padayon ang hot pursuit operation sa suspek.
